#اساسيات_الاسعافات_الاوليه
ف الحلقات اللي فاتت اتعلمنا اذاي نفكر بشكل منظم لما نشوف حادث او طارئ واذاي تحمي نفسك.
تعالو نراجع سوا بسرعه الخطوات .
قلنا اي حادث مهما كان لازم نعمل الاتي ...افحص ... اتصل ... اهتم..
وعرفنا ان افحص معناها افحص المكان اولا. وقلنا اختصار للي بيحصل كلمة setup.
وقلنا بعد فحص المكان بيجي فحص المصاب وقلنا اول حاجه ف فحص المصاب هي درجة الوعي وعرفنا ان درجات الوعي اربعه ويمثلهم الاختصار avpuوقلنا ان لكل حرف مدلول وكلمه بتعرفني درجة من درجات الوعي واتكلمنا عنهم ووصلنا لحرف ال U وقلنا دا شخص غير واعي يعني فاقد الوعي وغير مستجيب للنداء وغير مستجيب للالم وبكده وصلت ان حضرتك لازم تتاكد من ان الشخص ده علي قيد الحياه والقلب يعمل ولا لأ.. وعشان تتاكد لازم تقيم الدورة الدمويه ...وهو ده موضوعنا النهارده .
#تقييم الدورة الدمويه.
ودا بيكون ان حضرتك بتشوف ضربات القلب لازالت شغاله ومستمرة ولا لأ.
طيب هنعمل دا اذاي ؟.
بص يا سيدي ....هتعمله عن طريق قياس النبض .. وطبعا حضرتك تبادر الي ذهنك دلوقت انك هتحس النبض من الشريان اللي ف الرسغ . اسمحلي اقولك الاول ان ده غلط وبيقع فيه ناس كتير وياريت متضيعش وقت وتقيس من الحته دي وتعالا اقولك السبب .
هات ودنك وصحصح كده معايا . اثناء الحادثه او الطوارئ عموما قد يعاني المصاب من الصدمه ،اللي هي فشل الجهاز الدوري ف القيام بعمله بالبلدي كده هبوط حاد ف الدورة الدمويه بمعني ضخ الدم مش بيوصل للاطراف بقدر كافي وهنتكلم ف حلقه خاصه عن الصدمه.ان شاء الله.
طيب امال احس النبض منين؟
يا سيدي ف اي حاله طارئه هتحس النبض من اقرب شريان للقلب.واقرب شريان للقلب هو الشريان السباتي اللي ف الرقبه .ليييييه...
لانه اولا كبير وثانيا قريب م القلب وثالثا النبض فيه محسوس.
حط ف اعتبارك عشان تحس النبض من اي شريان لازم تضغط كويس ...
وعشان تقيس صح هتنفذ الخطوات دي.
هتستخدم تلات صوابع وابعد تماما عن الابهام ...لانه نابض...
الشريان السباتي موجود علي جانبي الرقبه يمين وشمال مش ف ناحية واحده بس.
هتحط ال3 صوابع ف منتصف الرقبه بالظبط من الامام فوق تفاحة ادم حاول تنزل بصوابعك يمين او شمال حسب الاسهل لحضرتك وانت ملامس للرقبه ولحد ماتوصل لحدود الرقبه من الامام اول ماتوصل اضغط لجوه هتحس النبض. علي فكرة انت مش مطالب تعد النبض ..انت مطالب تأكد فيه نبض ولا لأ...
لو فيه نبض معناه القلب مازال شغال ...
لو مفيش نبض معناه ان القلب توقف..
وكل حاله م الاتنين مختلفه ف الاكشن اللي هيتاخد
#يعني
لو فيه نبض هتنتقل للمرحله اللي بعدها وهي تقييم مجري الهوا.
لو مفيش نبض هنبدأ فورا الانعاش القلبي الرئوي CPR
هنختصر فحص المصاب ف تلات حروف CAB
#الCوبتمثل كلمة Circulation .... ومعناها الدورة الدمويه متمثله ف النبض
#الA وبتمثل كلمه Airway...... ومعناها مجري الهوا
#الB وبتمثل كلمة Breathing......ومعناها التنفس
ولازم تعملها بالتتابع ده
هتقيم الدورة الدمويه الاول (النبض ) لو ملقتش نبض هتبدأ فورا الانعاش القلبي الرئوي CPR لو لقيت نبض هتشوف مجري الهوا مفتوح ولا لأ ولو كان مقفول او مسدود هتزيل السبب وبعدها تشوف المصاب بيتنفس بشكل تلقائي ولا لأ وكل ده هنشوفه بالتتابع ف حلقات جايه ان شاء الله .
بناكد علي حضراتكم ان المعلومات الطبيه دائمة التجدد لانها نتاج ابحاث ودراسات عالميه.
