اساسيات_الاسعافات_الاوليه
ف الحلقات اللي فاتت اتفقنا مع بعض انه في اي حادث مهما كان حجمه لازم تفتكر 3كلمات (افحص..اتصل...اهتم ) وقلنا لازم تفحص المكان قبل فحص المصاب.
ففحص المكان اتفقنا علي كلمه SETUP وقلنا ان كل حرف بيمثل كلمه لازم تاخد بالك منها كويس قوي ووصلنا ف الحلقه اللي فاتت الي حرف p
وهو دا عنوان حلقتنا النهارده ....
حرف ال p .》》》》وهنلاقيه ف كلمه جميله جدا وهي كلمهprotection ومعناها الحمايه..
الحمايه شئ مهم جدا لان ببساطه ممكن حضرتك تتعرض لمخاطر كتير اثناء تقديم المساعده وواحده من اهم هذه المخاطر واشدها ضررا هي انتقال بعض الامراض المعديه اللي بتنتقل عن طريق سوائل المصاب (دم.قئ.لعاب.بول.براز..اغشية مخاطيه... )منك للمصاب او العكس.
#هااااااام ...لازم تفترض ان اي افرازات للمصاب فيها عدوي وتتعامل مع المصاب ع الاساس ده لحين ثبوت العكس...وبناكدعلي ان الكلام يشمل كل مصاب هتقابله حتي لو اقرب الاقربين ومهما كنت تعرفه او طبيعة علاقتك بيه.
#طيب. ليييه الكلام ده?
بص ياسيدي...لان ف الحقيقه فيه امراض كتيرة صعب التعرف عليها فبدايتها لان ملهاش اعراض واضحه ع المريض وكمان هو مشتكاش من اعراض غريبه
طيب زي ايه الأمراض دي؟
زي مثلا فيرسc ودا من اشهر الفيروسات ف وطننا العربي وحسب احصائيات وزارة الصحه المصريه الاصابه بتتراوح من 7 ل14% . وتحتل مصرالمرتبه الاولي عالميا بعدد مرضي قد يصل ل 20مليون مصاب. بكده جايز جدا ان المصاب اللي حضرتك هتتعامل معاه حامل للفيرس حتي بدون اي شكوي وكمان فيرس B الحامل للمرض لاتظهر عليه اي اعراض ف ف البدايه وكمان مرض نقص العوز المناعي واللي بنختصرة بكلمه الايدز.
وللعلم ان المصاب بمرض الايدز بيعيش فترة كبيرة دون ظهور اي اعراض عليه ويبان قدامك شخص سليم وبيمارس حياته الطبيعيه كمان.
بكده انت لازم تحمي نفسك كويس ودا هيكون عن طريق ادوات الحمايه الشخصيه واللي ابسط حاجه فيها الجوانتي ودا بيكون عازل بين ايديك وافرازات المصاب اللي هتتعامل معاه. بس متنساش ان شىرط اساسي ف الجوانتي انه يكون غير منفذ للسوائل .
ارتداء الجوانتي زي ماهو مفيد لحضرتك وبيكون حاجز صد للفيروسات والأمراض ..كمان هو له فايدة تانيه نفسيه كبيرة جدا...
اذاي الكلام ده،؟
بمجرد حضرتك ماتدخل وتساعد مصاب وانت لابس جوانتي فدا بيدي انطباع كويس جدا عند المصاب وعند الناس المحيطه بالمكان كمان ...هيحسوا براحه نفسيه والتوتر يقل لانهم شايفين حد فاهم ومدرك طبيعة الخطر وعارف يتعامل وعنده قدر من المعلومات ومدرك ومدرب ع الاسعافات الاوليه .وكمان الناس هتنفذ تعليماتك ...متخيل الموقف ...
طيب سؤال ....
اتفضل ياسيدي ..
مش دايما معايا جوانتي وبيصادفني اصابات وحالات محتاجه المساعده ..اعمل ايه...
بص ياسيدي لا ضرر ولا ضرار وهنمشي بمبدأ السلامه. ..
يعني....انت متضرش نفسك وتحكم علي نفسك تعيش بمرض لعين قاتل وتحكم علي اهل بيتك بنقل العدوي ليهم وكل ده عشان تنقذ غيرك بدون وسيلة حمايه ....خليك معايا هحكيلك قصه صغيرة. ..
هنفترض انك صادفت حادث واتعاملت معاه بكل شهامه ورجوله ولكن بعد فترة حضرتك تعبت وعملت تحاليل وظهر فيها والعياذ بالله ...فيرس الايدز
تفتكر الناس هتبصلك اذاي؟
طيب هيصدقوا انك اتصابت بالمرض اللعين ده نتيجه مساعدة حضرتك لمصاب ف حادث؟ ماظنش طبعا! !
ليه؟؟؟ لان المرض بيتنقل بكذا طريقه ولكن مجرد ذكر اسمه بننسي كل الطرق اللي بيتنقل بيها ونفتكر حاجه وحده بس .. هي ان المرض ده مرتبط بفعل مشين ووصمة عار نتيجة العلاقات الجنسيه المشبوهه..
م الاخر احمي نفسك درء للشبهات ومنع الفضايح
من وسائل الحمايه لو ملقتش جوانتي ممكن تستعمل كيس حتي لو كان مرمي ع الارض ..هتقولي الكيس مش نضيف ومش معقم . هقولك الجوانتي كمان مش معقم ....احنا بندور ع حاجز بينك وبين افرازات المصاب الهدف منه حمايتك م العدوي ...
طبعا انت خايف ع المصاب من الكيس الملوث ....
عندك حق وانا متفق معاك ف كده ...
بس ايه رأيك ان الجرح اصلا ملوث من محيط الحادث وكمان فالمستشفي الجرح هيمر بعدة مراحل بداية من غسيل الجرح وتطهيرة ثم الخياطه والغيار المعقم ثم العلاج والمضادات الحيويه حسب طبيعة الاصابه. عشان كده متقلقش من استعمال الكيس ..
متنساش ان الحمايه دي اهم حاجه قبل تقديم المساعده...
ليست هناك تعليقات:
إرسال تعليق